5. ദയ

എം.ടി. വാസുദേവൻ നായർ രചിച്ച 'ദയ' എന്ന പാഠഭാഗത്തെ ആസ്പദമാക്കിയുള്ള പ്രധാന കുറിപ്പുകൾ താഴെ നൽകുന്നു.

  • ⭕ 1001 രാവുകളിലെ ഒരു കഥയെ ആസ്പദമാക്കിയാണ് എം.ടി. വാസുദേവൻ നായർ 'ദയ എന്ന പെൺകുട്ടി' എന്ന ബാലസാഹിത്യ നോവൽ രചിച്ചത്. ബാഗ്ദാദ് പശ്ചാത്തലമാക്കി നടക്കുന്ന ഈ കഥ സുമുറൂദ് എന്ന ദയയുടേതാണ്.
  • ⭕ പ്രശ്നങ്ങളെയും പ്രതിസന്ധികളെയും ജീവിതനൈപുണികളെ ഉപയോഗപ്പെടുത്തി അതിജീവിച്ച ഒരു പെൺകുട്ടിയുടെ കഥയാണ് 'ദയ'യിലൂടെ എം.ടി. പറയുന്നത്.
  • ⭕ അതീവ ബുദ്ധിമതിയായിരുന്നു ദയ. സ്വത്ത് മുഴുവൻ നഷ്ടപ്പെട്ട ദരിദ്രനായ യജമാനനെ എല്ലാവരും ഉപേക്ഷിച്ചു പോയിട്ടും ദയ മാത്രം കൂടെ നിൽക്കുന്നു. സ്വന്തം ബുദ്ധി വൈഭവം കൊണ്ട് യജമാനനായ മൻസൂറിനെ പല അപകടങ്ങളിൽ നിന്നും ദയ രക്ഷപ്പെടുത്തുന്നുണ്ട്.
  • ⭕ ജ്ഞാനപീഠം ജേതാവായ (1995) എം.ടി. വാസുദേവൻ നായർ കുട്ടികൾക്ക് വേണ്ടി എഴുതിയ 'ദയ എന്ന പെൺകുട്ടി' (1992) എന്ന നോവലിൽ നിന്ന് അദ്ദേഹം തന്നെ രൂപപ്പെടുത്തിയ തിരക്കഥയാണ് ദയ.
  • ⭕ പ്രമേയത്തിലും അവതരണത്തിലും ഏറെ വ്യത്യസ്തത പുലർത്തിയ അറേബ്യൻ പശ്ചാത്തലത്തിലുള്ള ഈ രചന സംസ്ഥാന സർക്കാരിന്റെ ഏറ്റവും നല്ല തിരക്കഥയ്ക്കുള്ള പുരസ്കാരം നേടി. ഇന്ദിരാഗാന്ധി പുരസ്കാരം ഉൾപ്പെടെ ദേശീയതലത്തിലും സംസ്ഥാനതലത്തിലുമായി പ്രധാനപ്പെട്ട 7 പുരസ്കാരങ്ങൾ ഈ ചലച്ചിത്രം കരസ്ഥമാക്കിയിട്ടുണ്ട്.

കഥാപാത്രനിരൂപണം - ദയ

  • ⭕ എം.ടി. വാസുദേവൻ നായരുടെ ദയ എന്ന തിരക്കഥയിലെ കേന്ദ്ര കഥാപാത്രമാണ് ദയ.
  • ⭕ ദരിദ്രനായിത്തീർന്ന യജമാനനെ ഉപേക്ഷിച്ചു പോവാതെ ഒപ്പം നിന്ന് സഹായിക്കുവാൻ മനസ്സ് കാണിച്ച ദൃഢനിശ്ചയമുള്ള, ധൈര്യവും പക്വതയും ലക്ഷ്യബോധവുമുള്ള പെൺകുട്ടി.
  • ⭕ അറിവും ബുദ്ധിവൈഭവവും തന്ത്രപരമായ ഇടപെടലും പക്വതയുമാണ് ദയയെ ഉയരങ്ങളിലെത്തിച്ചത്.
  • ⭕ ജീവിതനൈപുണികളെ എങ്ങനെ ഫലപ്രദമായി ഉപയോഗപ്പെടുത്താം എന്ന് ദയ സ്വന്തം ജീവിതം കൊണ്ട് തെളിയിച്ചു. ലക്ഷ്യബോധം, പക്വത, ബുദ്ധിവൈഭവം, തന്ത്രപരമായ ഇടപെടലുകൾ, ദൃഢനിശ്ചയം, സ്ഥൈര്യം, ആയോധനശേഷി എന്നീ ഗുണങ്ങളെല്ലാം ദയ എന്ന കഥാപാത്രത്തിൽ സമ്മേളിച്ചിരിക്കുന്നത് കാണാം.
  • ⭕ രാജാവിനെ എളുപ്പത്തിൽ തോൽപ്പിക്കാമായിരുന്ന സന്ദർഭത്തിൽ വളരെ ദീർഘവീക്ഷണത്തോടെ ദയ കൈക്കൊണ്ട പക്വതയാർന്ന തീരുമാനം ഏറെ മാതൃകാപരമാണ്.
  • ⭕ അറിവല്ല തിരിച്ചറിവാണ് പ്രധാനമെന്ന് നമ്മെ പഠിപ്പിക്കുകയാണ് ദയ.

ജീവിതവിജയം നേടുന്നതിനും ലിംഗഭേദം ഒരു തടസ്സമല്ല എന്ന വലിയ തിരിച്ചറിവ് ബാക്കിയാക്കുകയാണ് ഈ പാഠഭാഗം.

തിരക്കഥ

സിനിമയുടെ അടിസ്ഥാന ഘടകമാണ് തിരക്കഥ അഥവാ സ്ക്രീൻപ്ലേ. അനുഭവങ്ങളാണ് തിരക്കഥകൾക്ക് അവലംബം. കഥയിൽ നിന്നും വ്യത്യസ്തമായ അനുഭവതലമാണ് തിരക്കഥ പ്രധാനം ചെയ്യുന്നത്. ശബ്ദ ദൃശ്യ സൂചനകൾ അടങ്ങിയ കഥയാണ് തിരക്കഥ. സിനിമയുടെ സാഹിത്യ രൂപമാണ് തിരക്കഥ.